നോട്ടുപിൻവലിക്കലും ബാങ്ക് ഫീസും

നോട്ടുപിൻവലിക്കൽ ഇന്ത്യ കണ്ട ഏറ്റവും ധീരമായ നടപടിയാണ്. നികുതിവെട്ടിക്കാനും കള്ളപ്പണം വെളുപ്പിക്കാനും ആഗ്രഹിക്കുന്നവർ പരമാവധി സാമ്പത്തീക ഇടപാടുകൾ കറൻസി നോട്ടു വഴി മാത്രമേ നടത്താറുള്ളൂ, എന്നത് പകൽ പോലെ യാഥാർഥ്യമാണ്. ഇതിനു അറുതി വരേണ്ടതും ബാങ്കിങ് / ഡിജിറ്റൽ സാമ്പത്തീക ഇടപാടുകൾ പ്രോത്സാഹിപ്പിക്കേണ്ടതും രാജ്യസുരക്ഷയ്ക്കും പണപ്പെരുപ്പം കുറയ്ക്കുന്നതിനും അത്യാവശ്യമാണ്. 

പക്ഷെ കറൻസി രഹിത സമൂഹത്തെ ക്കുറിച്ച് വാതോരാതെ സംസാരിക്കുകയും എന്നാൽ ഓൺലൈൻ / ഡിജിറ്റൽ ഇടപാടുകൾക്ക് വലിയ കമ്മീഷൻ ഈടാക്കുകയും ചെയ്യുന്ന ദുരവസ്ഥയാണ് ഇപ്പോൾ കാണുന്നത്. ഓൺലൈൻ പേയ്മെന്റ്, ഫണ്ട് ട്രാൻസ്ഫർ, നെഫ്ട്, ആർ.ജി.ടി.എസ് ഇടപാടുകൾ, ബില്ല് പേയ്മെന്റ്, ടിക്കറ്റ് ബുക്കിംഗ് എന്നിവയ്‌ക്കെല്ലാം അന്യായ ഫീസാണ് ബാങ്കുകളും ക്രെഡിറ്റ് കാർഡ് കമ്പനികളും ഈടാക്കുന്നത്. നോട്ടിടപാടുകൾ കുറച്ചുകൊണ്ട് ഇന്ത്യൻ സാമ്പത്തികരംഗം ഡിജിറ്റൽ ആക്കണമെങ്കിൽ സർക്കാർ ശക്തമായി ഇടപെടണം. ബാങ്കിങ് / ഓൺലൈൻ ട്രാൻസാക്ഷനുകൾക്ക് പ്രത്യേക ഇളവുകളും സമ്മാനങ്ങളും നൽകണം. നിലവിലുള്ള സർവീസ് ചാർജുകളും ട്രാൻസാക്ഷൻ ഫീസുകളും പൂർണമായും എടുത്തു കളയണം. ഒരു ബാങ്ക് അക്കൗണ്ടിൽ നിന്നും മറ്റൊരാളുടെ ബാങ്ക് അക്കൗണ്ടിലേക്ക് പണം കൈമാറ്റം ചെയ്യുമ്പോൾ നിലവിലുള്ള ഫീസ് ഉടനടി എടുത്തുകളയണം. 

ബി.എസ.എൻ.എൽ , കെ.എസ.ഇ.ബി, എൽ.ഐ.സി, ഗ്യാസ് ബുക്കിംഗ് എന്നിവ ഓൺലൈൻ ആയി നടത്തുന്നവർക്ക് ഡിസ്‌കൗണ്ട് നൽകി പ്രോത്സാഹിപ്പിക്കണം. നിലവിൽ ഡിജിറ്റൽ ട്രാന്സാക്ഷൻസ് സാധാരണക്കാരന് ഭാരമാണ്, ഇത് എത്രയും പെട്ടെന്ന് ചാർജ്ജുകൾ ഒഴിവാക്കി, എളുപ്പമാക്കണമെന്നു അഭ്യർത്ഥിക്കുന്നു.     

ജോസി വർക്കി 

ചാത്തങ്കേരിൽ 

പെരുമ്പിള്ളി 682314

ഗ്രാന്‍ഡ്‌ കേരള ഷോപ്പിംഗ്‌ ഫെസ്ടിവല്‍

അരിവിലയും പച്ചകറി വിലയും വാണം വിട്ടപോലെ കുതിച്ചു പായുന്നു. സപ്ലൈകോ കടകളില്‍ പകുതി സാധനങ്ങളും കിട്ടാനില്ല. എന്നാലും 'ഗ്രാന്‍ഡ്‌ കേരള ഷോപ്പിംഗ്‌' സര്‍കാര്‍ നേതൃത്വത്തില്‍ പൊടിപൊടിക്കുന്നു!! അരിയില്ലെങ്കിലെന്ത്? സ്വര്‍ണവും പട്ടുസാരികളും മലയാളികള്‍ക്ക് സുലഭമായി കിട്ടുന്നുണ്ടല്ലോ? എല്‍.ഡി.എഫ്. കക്ഷികള്‍ പണ്ട് തല്ലിപ്പോളിച്ച 'ബിഗ്‌ ബസാര്‍' ആണ് ഇതിന്റെ ഒരു മുഖ്യ സ്പോണ്‍സര്‍ എന്നത് 'വൈരുദ്ധ്യാത്മക വിരോധാഭാസം' ?? എന്തായിരുന്നു തിരുവനന്തപുരം ബിഗ്‌ ബസാറിനു മുന്നിലെ പ്രകടനം?? ഇപ്പൊ, അതേ കുത്തകകള്‍ക്ക് പാലുകൊടുക്കുന്നത് കാണാന്‍ എന്ത് രസം.

ഇത്തവണയും 'ഓണം' അടിച്ചുപൊളിക്കണ്ടേ?

ഓണം കേരളത്തിന്റെ ദേശിയ ഉത്സവമാണ്. പൊന്നിന്‍ ചിങ്ങമാസത്തിലാണ് ഓണം നാം ആഘോഷിക്കുന്നത്. ലോകത്തിന്റെ നാനാഭാഗത്തുമുള്ള മലയാളികള്‍ ജാതിമതഭേദമന്യേ ഈ ഉത്സവം കൊണ്ടാടുന്നു. ഓണം ആത്യന്തികമായി ഒരു വിളവെടുപ്പുത്സവമാണെന്ന് കരുതിപ്പോരുന്നു.

ആരാണ് വിളവെടുപ്പ്‌ നടത്തുന്നത്? സ്വര്‍ണ്ണ കടക്കാര്‍, ഗൃഹോപകരണ കടക്കാര്‍, വസ്ത്ര വ്യാപാരികള്‍, സര്‍ക്കാര്‍(മദ്യം,ലോട്ടറി) .... തുടങ്ങിവര്‍ കൊയ്ത്തുതുടങ്ങി കഴിഞ്ഞു. ഇലക്ട്രോണിക് വസ്തുവകകള്‍, സ്വര്‍ണാഭരണങ്ങള്‍, തുണിത്തരങ്ങള്‍, മദ്യം... തുടങ്ങി കോടിക്കണക്കിനു രൂപയുടെ സാധങ്ങള്‍ കേരളത്തിലെക്കൊഴുകുന്നു. മാര്‍വാടികളും ചെട്ടിയാര്‍മാറും ഓണത്തിന് വിളവെടുപ്പ്‌ നടത്തി കീശനിറച്ചു സന്തോഷത്തോടെ മടങ്ങുന്നു. ബോണസും ബാക്കി കടവും വാങ്ങി മലയാളികള്‍ ഓണം പൊടി പൊടിക്കുന്നു!!

പൂവേ പൊലി പൂവേയ്.....

(ആഗോള സാമ്പത്തീക മാന്ദ്യം: ഈയാഴ്ച വല്ല അമേരിക്കന്‍ സായ്പ്പും കൊച്ചിയില്‍ വന്നു ഷോപ്പിംഗ്‌ കണ്ടാല്‍‍ ഹാര്‍ട്ട് അറ്റാക്ക്‌ വന്നു മരിച്ചു പോകും)